Category Archives: Mangoli

Adat Batak – Pangolihon anak/Pamuli boru – 2

BAGIAN II

MARHATA SINAMOT

Dimulana ulaon marhata sinamot dipatupa andorang so pesta unjuk, alai di tingki nuaengon nunga somal dipatupa na marhata sinamot laos di mata ni pesta unjuk i.

-

1. MARHATA SINAMOT ANDORANG SO PESTA UNJUK/PAMASUMASUON

Nunga mansai jarang ulaon di tingkion marhata sinamot andorang so pesta unjuk alai sai tong do adong na mangulahon, alai na porlu ima: “Di na marhata sinamot nunga mangadopi hulahula ni pihak parboru dohot hulahula ni pihak paranak”.

Tutur na niontang ni parboru dohot paranak:

-          Dongan tubu

-          Boru/bere

-          Dongan sahuta

-          Hulahula

Pinggan panungkunan mardalan holan di tingki na marhata sinamot do, jala holan sahali. Nang pe asing ari ni namarhata sinamot dohot pesta unjukna, holan di na marhata sinamot do mardalan pinggan panungkunan. Molo parjolo marhata sinamot sian pesta unjuk, dibagasan undangan ma dibahen amplop na marisi hepeng. Di pihak parboru digoari ma i “PINGGAN PANGANAN”, molo di pihak paranak digoari ma i ‘ULOS TINONUN SADARI”, alai tu sude horong ni hulahula/tulang “PINGGAN PANGANAN” do i digoari. Jala on laos boaboa do tu na niontang naung diulahon marhata sinamot. Songoni do nang suhi ni ampang na opat dohot tintin marangkup nunga boi dipasahat dung sidung marhata sinamot. Suang songon i nang sinamot pe nunga boi dipasahat sude (gok), alai molo sebagian dipasahat di mata ni ulaon i, tong do uli.

Dung sidung marsipanganon di pesta unjuk, marbagi jambar ma. Udut tusi pihak paranak mangido tingki asa manjalo tumpak sian angka tuturna. Dung singkop on sude diulahon, dimulai ma panghation. Ditingki na manungkun hata ni sipanganon pihak parboru, laos di son ma tingki paboahon tu sude raja naniontang godang ni sinamot naung diundukhon sipasahaton ni paranak. Jala molo adong dope na hurang, di son ma sude panggonopi ni sinamot dipasahat tu parboru. Songoni do nang godang ni ulos ditingki on ma ditariashon dohot angka na mardomu tu si (suhi ni ampang na opat, titin marangkup). Dung i diuduti ma muse:

-          Pasahat panggohi ni sinamot, molo so sahat dope sude

-          Pasahat ulos herbang

-          Marhata sigabegabe

-          Diujungi hulahula

-

2. MARHATA SINAMOT DOHOOT MARPESTA UNJUK DIBAGASAN SADARI

Godang do na mangulahon marhata sinamot dohot pesta unjuk dibagasan sadari lumobi na di kota. Dung sidung marsipanganon, marbagi jambar ma, laos mangido tingki ma paranak asa manjalo tumpak nasida sian angka tondongna.

Dung singkop sude diulahon, disungkun pihak parboru ma hata ni sipanganon. Mangalusi ma paranak na adong maksud ni nasida pasahat sinamot huhut manjalo dohot pasahat adat na gok (somalna di ulaon sisongon on nunga jolo adong diulahon nasida parhusipon).

Di ombason ma dihatai:

-          Godang ni sinamot

-          Suhi ni ampang na opat

-          Pinggan panganan

-          Godang ni ulos herbang

-          Ulos tinonun sadari

-          Tintin marangkup

Dung singkop on sude dihatai raja parhata, dipaboa ma tu hasuhuton bolon (parboru), molo dung suman dioloi ma.

PANGULAHONNA

Sipasahaton ni  paranak:

-

a. Sinamot na gok tu suhut bolon, alai jolo dietong raja parhata ni parboru manang naung gok songon na ginollit

b. Suhi ni ampang na opat:

-          Todoan ni sijalo bara (Amang tua/uda ni boru muli)

-          Todoan ni simandokkon (Iboto ni boru muli)

-          Todoan ni tulang (Tulang ni boru muli)

-          Todoan ni ompung (Ompung ni boru muli, molo mangolu dope, khusus)

Sude angka sijalo todoan adong do tolu mansam kewajibanna, alai molo sebagian pe dipasahat nauli do ima:

-          Pasahat ulos herbang

-          Pasahat dengke

-          Pasahat parbue gabe

c. Tu sude tondong na niontang ni paranak dipasahat do jambar nasida ima hepeng na margoar pinggan panganan.

Sipasahaton ni parboru:

a. Ulos pansamot

b. Ulos tu suhi ni ampaang na opat:

-          Ulos hela

-          Ulos pangabarai/pangamai (Amang tua/uda ni anak mangoli)

-          Ulos simanggonghon (Haha/anggi ni anak mangoli)

-          Ulos sihunti ampang (Namboru/iboto ni anak managoli)

-          Ulos pargomgom (Ompung ni anak mangoli, molo mangolu dope, khusus)

Na pasahat todoan/panandaion tu suhi ni ampang na opat ni pihak parboru, langsung do pihak paranak. Songon i do nang suhut parboru, langsung do pasahat ulos herbang tu suhi ni ampang na opat ni paranak. Alana molo adong namasa/ulaon di ari na mangihut suhut na dua pihak on do masiontangan. Jadi porlu do masitandaan angka suhut dohot paidua ni suhut ni tuturna.

c. Suang songoni do angka tutur na niontang ni paranak i ma:

-          Dongan tubu

-          Boru/bere

-          Dongan sahuta/aleale

Sude do dapotan ulos tinonun sadari (bentuk hepeng)

-

-

TINTIN MARANGKUP

Anak di halak batak berkewajiban do manopot/mangalap/mangoli boru ni tulang. Molo ndang boru ni tulang di topot, adong ma kewajiban ni paranak dohot parboru pasahat tintin marangkup (bentuk hepeng) tu tulang ni anak mangoli. Paranak mangalehon sabagian, parboru mangalehon dua bagian (dua hali godang ni na nilehon ni paranak), jala dipasada do i dibagasan amplop. Paranak holan patandahon parboru do tu tulang ni anak mangoli alai na pasahathon tintin marangkup parboru do. Jadi dung dijalo tulang ni anak mangoli jambarna i, dianggap ma na nialap ni berena i songon boru tubuna.

Jadi adong ma kewajibanna songon parboru pasahat ulos herbang, dengke, parbue gabe, i do umbahen na adong umpasa na mandok:

Hot pe jabu i tong do margulanggulang

Boru ni ise pe dialap bere i tong do i boru ni tulang

3.  PASAHAT ULOS TU PENGANTEN

Pasahat ulos holong parboru:

Mardangka salohot, tanda do na sumolhot.

Ise na sumolhot ima na parjolo pasahat ulos:

-          Dongan tubu

-          Boru

-          Dongan sahuta

-          Ulos ni parsadaan

Dung i pinasahat ma tingki tu tulang laho pasahathon ulos sian horong ni tulang ni parboru:

-          Hulahula/tulang tangkas ni boru muli

-          Tulang

-          Tulang rorobot

-          Hulahula ni na marhahamaranggi

-          Hulahula ni anak manjae

-          Bona tulang

Alai molo dipanghataion (marhata sigabegabe), tulang tangkas ni boru muli ma parpudi/pargomgom. Dung singkop on sude, parboru mangalehon tingki tu horong paranak pasahat ulosna.

Pasahat ulos sian horong ni hulahula/tulang ni paranak

-          Hulahula/tulang tangkas ni pangoli

-          Tulang

-          Tulang rorobot

-          Hulahula ni na marhahamaranggi

-          Hulahula ni anak manjae

-          Bona tulang

Molo di panghataion (marhata sigabegabe) tulang tangkas ni pangoli ma parpudi. Tangkas do hita sude mamboto dung sidung marhata sinamot na parjolo dipasahat pihak paranak/pamoruon ima:

-          Sinamot na gok tu suhut na bolon

-          Todoan tu suhi ni ampang na opat

-          Dung i dipasahat ma muse angka pinggan panganan

Suang songon i do na pasahat ulos pihak parboru

-          Parjolo ma dipasahat ulos pansamot tu natoras ni hela

-          Mangihut ma ulos hela tu penganten

-          Ulos tu sijalo todoan (suhi ni ampang na opat) sian paranak

-          Dipasahat ma muse ulos tinonun sadari

Songoni do nang horong ni tulang na pasahat ulos, na manjalo todoan (tulang tangkas ni boru muli/tulang tangkas ni hela; molo dung tingkina/giliran ni tulang) angka on do na parjolo pasahat ulos sian horong ni angka tulang dohot sian horongna sandiri. Dung i mangihut ma angka na pasahat ulos hombar tu urutanna. Jadi asa na sumolhot ma na parjolo pasahat ulos herbang.

Alai molo di panghataion gabegabe, tulang tangkas ma parpudi/pargomgom laho mandok hata gabe. Nuaeng on mardomu tu arga ni tingki nunga adong angka horong ni tulang napajolohon pasahat ulos herbang hape tulang tangkas sandiri ndang dope pasahat ulosna tu penganten.

Parpudi ma dibahen nasida tulang tangkas ni boru muli/anak mangoli pasahat ulos herbang. Jala dung sidung nasida pasahat ulos somalna langsung mulak be, hape adong dope kewajibanna pasahat hata pasugabe. Jadi mangihuthon pandapot ni panurat hurang tingkos do on ai nunga parpudi dibahen nasida pasahat ulos herbang SIJALO TODOAN. Lumobi di uduran ni tulang tung hurang tingkos do si songon i, alana tulang tangkas on do marhara dongan tubuna, jadi tulang tangkas i do tongotong siihuthonon ni uduranna di ulaon i.

4.  MARHATA SIGABEGABE

Urutan ni na mandok hata/marhata sigabegabe di pihak parboru

-          Boru/bere

-          Dongan sahuta/aleale

-          Dongan tubu

Dung singkop on sude mandok hata, dipasahat ma tu horong ni hulahula/tulang ni pihak parboru, urutanna ima:

-          Bona tulang

-          Hulahula ni anak manjae

-          Hulahula ni na marhahamaranggi

-          Tulang rorobot

-          Tulang

-          Hulahula (tulang tangkas ni boru muli)

Dung sidung on sude mandok hata, mangampu ma paidua ni hasuhuton dung i dipasahat ma tu hasuhuton bolon asa diampu. Dung singkop on sude diulahon, dipasahat ma muse tu pihak paranak. Paranak pasahathon tu horong ni hulahulanasida laho pasahat hata sigabegabe.

Urutan ni na mandok hata sian horong ni hulahula ni paranak:

-          Bona tulang

-          Hulahula ni anak manjae

-          Hulahula ni na marhahamaranggi

-          Tulang rorobot

-          Hulahula (tulang tangkas ni pangoli)

Dung sidung on sude diulahon mangampu ma pihak paranak, urutanna ima:

-          Dongan sahuta/aleale

-          Boru/bere

-          Dongantubu

-          Parsadaan marga laos tingkion ma pasahat kado ni parsadaan

-          Paidua ni hasuhuton

-          Hasuhuton

-          Penganten

-          Dipasahat ma muse tu hulahula asa ditutup dohot ende/tangiang

Dung sidung on sude dipasahat ma olopolop (hepeng), hepeng on sebagian sian suhut paranak sebagian nari sian suhut parboru, pihak paranak pasahathon tu pihak parboru asa dipadomu dung i muse dibagi dua. Bagian ni paranak dipasahat ma tu horong nasida asa dibagibagi laos songon i nang pihak parboru pasahathon tu horongnasida. Dung sidung dibagi tu ganup horong diolophonma panggabean parhorasan 3x (tolu hali)

Olopolop!!!!!…..olopolop!!!!!…..olopolop

5. MANINGKIR TANGGA DOHOT PAULAK UNE

Hombar tu arga ni tingki (demi efisiensi waktu dan ekonomi) nuaeng on dung sidung ulaon unjuk pintor diuduti ma tu maningkir tangga dohot paulak une manang mebat, jala on ma naginoaranna ULAON SADARI. Pihak paranak paradehon jual (indahan dohot sipanganon lengkap dohot namargoarna) na laho pasahatonna tu hulahulana.

Pihak parboru pe tong do paradehon jual (dengke, indahan, parbue gabe dohot lampet) na laho pasahatonna tu boruna. Dipeakhon ma jual on sude di adopan, dung i diujungi hulahula ma ulaon na maningkir tangga dohot na paulak une on dibagasan tangiang.

Pihak paranak mangalehon upa panaruhon (ongkos/hepeng) tu pihak parboru. Paranak mangontang horongnasida (dongan tubu, boru/bere) tu jabu laho manigati jual na sian hulahulana. Laos di tingkion ma pasahat hata tu penganten baru songon tambahan bekal dinasida laho mangalugahon rumatangga na imbaru napinungkanasida.

Parboru pe tong do mangontang dongan tubu dohot boru/berena tu jabu laho manigati jual na pinasahat ni pamoruonna.

Dung i, mulak be ma sude angka tondong/tutur.

NB:

-          Molo pesta unjuk dialap jual (ulaon di huta ni parboru) diulahon ma maningkir tangga dohot paulak une.

-          Molo pesta unjuk ditaruhon jual (ulaon di huta ni paranak) diulahon ma mebat

-          Cara pangulahononna dohot sipanganon na pinatupa di ulaon maningkir tangga dohot mebat sarupa do.

Leave a comment

Filed under Adat, Habatahon, Mangoli, Muli

Adat Batak – Pangolihon anak/Pamuli boru

BAGIAN I

PAJONGJONG RUMATANGGA

Adong dua cara pajongjong rumatangga:

1. MARPASUPASU/PESTA UNJUK

A. Patua hata dohot Parhusipon

Dung adong panghataion masiolooloan di sada dolidoli (anak baoa) dohot sada namarbaju (anak boru) naeng pajongjong rumatangga naimbaru, ganup ma nasida nadua paboahon tu natorasna be.

Di Toba Holbung (Laguboti) ndang adong ulaon parhusipon. Domudomu (perantara) sian paranak do parjolo manghatai dohot domudomu sian parboru niutus ni suhut na dua pihak. Tu domudomu on dipaboa parboru dohot paranak angka pangidoan nasida. Dung cocok pangidoanni suhut na dua pihak, lansung ma muse angka suhut manghatai, dibuhul ma tingki/ari marhata sinamot dohot pesta unjukna.

Molo di Jakarta dohot luat na asing nunga diulahon na patua hata dohot parhusipon andorang so marhata sinamot. Utusan ni natoras sian paranak laho ma mandapothon natoras ni anak boru (parboru) patandahon diri huhut manghatahon maksudnasida na naeng ro patua hata/marhusip. Di ulaon patua hata (marhusip), paranak dohot parboru ndang manggora/manggonghon hulahulana.

Parboru dohot paranak manggora/manggonghon:

-          Dongan tubu

-          Boru/bere

-          Dongan sahuta

Ulaon patua hata (parhusipon) dipatupa di huta ni parboru. Paranak mamboan sipanganon dohot namargoarna, parboru paradehon dengkena. Andorang so marsipanganon, dipasahat paranak ma tudutudu ni sipanganon tu parboru, laos songon i do nang parboru pasahathon dengkena tu paranak. Alai sipata dang pintor dijalo parboru tudutudu ni sipanganon i jala dengke na pe ndang pintor dipasahat tu paranak. Alana mabiar do parboru atik adong panghataion na so satolop (ndang akur) hape nunga masileanan tudutudu ni sipanganon. Jadi ditongatonga ni loloan ma dipeakhon tudutudu ni sipanganon dohot dengke ni parboru i jala didok ma goarna “JAMBAR NI ADOPAN” lapatanna sude do nampunasa. Dung i pe asa marsipanganon.

Na mamilang tangiang marsipanganon somalna sian paranak do. Dung sidung marsipanganon parboru manunghun partording ni tudutudu ni sipanganon i. Paranak mangalusi: “Surungsurung ni hamu hulahulanami do i”. Jadi dibuat parboru ma sian tongatonga asa dibaginasida. Alai anggo dengke i jambar ni paranak do jala tong ma dibuat paranak sian tonga ni loloan.

Dung i muse, parsinabung ni parboru manunghun lapatan manang hata ni sipanganon i. Paranak pe mangalusi ma, laos dipaboa: “Naung adong panghation ni naposo jala nunga masitiopan hata anaknami dohot boru ni raja i hulahulanami, songon i ma mangihuthon boaboa  ni anaknami. Pihak paarboru pe disunghun ma boruna manang na toho do hata ni paranak i. Molo dung tinghos naung adong dinasida hata na masioloan (masitiopan hata) dijalo ma hata ni paranak i, on ma nanidokna patua hata (ai nunga sahat hata tu natuatua). Dung i laos dipangido paranak ma asa diuduti sahat tu parhusipon (mangarangrangi).

Parboru pe somalna tong do satolop tu pangidoan ni paranak i. Goar na do parhusipon, molo panghatahonna tong do gogo (tangkas) jala sude do tutur na ro i umbegesa. Jadi dihusipi (dirangrangi) ma disi:

  1. Pangalaho ni pesta (dialap manang ditaruhon jual)
  2. Godang ni sinamot
  3. Todoan suhi ni ampang na opat
  4. Godang ni ulos
  5. Tintin marangkup
  6. Ari/tanggal partumpolon
  7. Inganan/Gareja partumpolon
  8. Ari/tanggal Pamasumasuon
  9. Inganan/Gareja pamasumasuon
  10. Alaman/Gedung pesta unjuk
  11. Godang ni undangan:

-    Parboru

-    Paranak

Dung sidung sude dihatai jala diundukhon na dua suhut, mangalehon hata pasupasu ma parboru tu paranak, tar songon on ma parjojorna:

  1. Mandok hata boru/bere
  2. Mandok hata dongan sahuta
  3. Mandok hata dongan tubu
  4. Mandok hata (manggohi) hasuhuton bolon

Sidung on sude diulahon, dipasahat ma tu suhut paranak asa diampu, songon on ma parjojorna:

  1. Mangampu dongan sahuta
  2. Mangampu boru/bere
  3. Mangampu dongan tubu
  4. Mangampu (manggohi) hasuhuton bolon

Dung sidung on sude, dipasahat parsinabung ni suhut paranak ma acara tu parboru jala diujungi parboru ma dohot ende/tangiang.

Catatan: Hasil ni panghataion naung ditolopi di parhusipon dipangke ma i gabe acuan tu ulaon na marhata sinamot.

-

B. Pangulahon ni pesta unjuk (Pamasumasuon)

1). Ditaruhon jual

Najolo pangoli dohot pandongani do na laho tu huta ni parboru mangalap jual asa rap borhat tu gareja. Rap udur ma borhat tu gareja pengantin, pandongani dohot sude uduran ni parboru. Ia natoras ni pengantin baoa dohot angka uduranna paintehon do di gareja. Jadi natoras ni pengantin boru dohot natoras ni pengantin baoa songon i nang angka uduranna pajumpang di gareja do. Di son ndang adong sibuhabuhai. Dung sidung pamasumasuon di gareja, rap udur ma tu huta ni paranak laho mangalehon dohot manjalo adat na gok. Molo ulaon sadari do, laos dipatupa ma disi jual sian paranak dohot jual sian parboru (jual ni parmebaton)

Di tingki saonari on ulaon unjuk ditaruhon jual manang dialap jual nunga jolo diulahon marsibuhabuhai jala rap borhat ma sian jabu ni parboru tu gareja, ala di tingki ulaon adat di gedung hasuhutan bolon nadua sibuk do mandapothon/manosoi angka tondongna be gabe dang adong be tingki marsipanganon. Jadi di tingki marsibuhabuhai nama kesempatan ni hasuhuton bolon nadua marsipanganon.

2). Dialap jual

Paranak nang pangoli songon i nang uduranna mamboan sipanganon dohot namargoarna laho pasahatonna tu hulahulana. Parboru paradehon dengkena na laho pasahatonna tu pamoruonna. Dung sidung paranak pasahathon tudutudu ni sipanganon tu hulahulana jala parboru pasahathon dengkena tu pamoruonna diuduti ma tu na marsipanganon. Na mamilang tangiang marsipanganon sian paranak do.

Na mangujungi dohot tangiang laho borhat tu gareja sian hulahula ma, ulaon on ma nanidokna marsibuhabuhai. Dung sidung pamasumasuon di gareja, rap udur ma tu huta ni parboru laho mangalehon dohot manjalo adat na gok. Molo ulaon sadari do, dipatupa ma disi jual sain paranak dohot jual sian parboru na laho pangkeonna di ulaon maningkir tangga dohot paulak une.

Songon i ma ruhutruhut ni pesta unjuk di halak Batak.

-

-

2. MANGALUA

Nunga adong dos ni roha (tahi) ni sada dolidoli dohot sada namarbaju pajongjong rumatangga (keluarga naimbaru) alai natuatua ni sidoli songon i nang natuatua ni namarbaju i ndang manolopi di rencananasida i, gabe tubu tu pingkirannasida laho menempuh jalan pintas: “Mangalua (kawin lari)”.

Najolo andorang so ro dope ugamo Kristen tu tano Batak, molo diluahon dolidoli sada namarbaju tu hutana pintor dipaboa dolidoli i do tu natorasna. Paranak pe dijou ma dongan tubu, boru, bere dohot dongan sahutana laho patupahon partangiangan. Sidung marsipanganon, mandok hata gabe ma angka tutur tuhasuhuton dohot tu pengantin baru. Mangampu ma muse suhut dohot pengantin baru, dung i dipasahat ma tu haha ni partubu asa diujungi dohot tangiang. Dung i laho ma dongan tubu dohot pamoruonna (hirahira 3-4 halak) tu huta ni parboru manaruhoon ihurihur (boaboa) na.

Alai dung ro ugamo Kristen tu tano Batak, tu jabu ni pangula huria nama pangalua dohot naniluahonna laho, jala disi ma tinggal paima sahat tu panghataion ni natuatua asa boi marpasupasu. Molo ndang tu jabu ni pangula ni huria dianggap melanggar peraturan ni gareja do gabe dipabali/dipecat sian huria.

Adong do pigapiga cara pamasumasuon ni na mangalua:

-

a. Diadopi holan tutur ni paranak (dongan tubuna, boru/berena dohot dongan sahutana)

Dung sidung pamasumasuon di gareja, digonghon paranak ma sude tondongna tu jabunasida laho patupa partangiangan. Sidung marsipanganon sude ma angka tondong na ro i pasahat hata gabe tu hasuhuton dohot tu pengantin baru. Dung diampu suhut dohot pengantin baru dipasahat ma tu haha ni partubu asa diujungi dohot ende/tangiang. Dung i laho ma muse dongan tubu dohot boruna manaruhon ihurihur tu parboru paboa naung dirajahon borunasida.

-

b. Diadopi tutur pihak paranak dohot paidua ni suhut parboru

Godang do na mangulahon dipasupasu di jabu na mangalua. Dung sidung dipasupasu pangula ni huria pintor dipatupa do partangiangan. Andorang so marsipanganon dope, dipasahat ma tudutudu ni sipanganon tu parboru (hulahula) jala dijalo do i, alai molo ndang tupa dengkena ndang dijalo i. Ia tudutudu ni sipanganon sian paranak dohot dengke sian parboru dipeakhon do i di tongatonga ni loloan, i ma naginoaranna “Jambar Niadopan”. Dung sidung marsipanganon, dibagi ma parjambaran hombar tu parhundulna. Ihurihur/pangabis dipasahat ma tu parboru jala nasida ma paboahon tu parboru tangkas na dohot nasida mamereng/mangadopi boruna dipasupasu huhut nunga dijalo jambar ni hulahula. Molo adong tupa ulos,  denggan ma dipasahat ulos holong i alai molo so adong tong do uli i.

-

c. Diadopi Paranak dohot Parboru

Dung diboto paranak naung mangalua anakna di jabu ni pangula huria, paranak dohot dongan tubu, boru/berena patupa sipanganon dohot namargoarna laho boanonnasida tu huta ni parboru. Mansai denggan do dipaboa haroro ni paranak tu parboru asa diboto parboru manggonghon angka tutur dohot dongan sahutana jala paradehon dengkena sipasahatonna tu paranak.

Andorang so marsipanganon dope, dipasahat ma tudutudu ni sipanganon jala parboru pe pasahathon dengkena. Ia tudutudu ni sipanganon sian paranak dohot dengke sian parboru dipeakhon do i di tongatonga ni loloan, i ma naginoaranna “Jambar Niadopan”. Dung sidung marsipanganon, disungkun parboru ma lapatan/hata ni sipanganon na binoan ni paranak. Di ombas on ma dipaboa paranak tu parboru naung di jabu ni pangulahuria anakna dohot borunasida marsada tahi laho pajongjong ruma tangga naimbaru. Suman do ulaon on songon ulaon Marhusip jala laos di son do dirangrangi:

-    Godang ni sinamot

-    Suhi ni ampang na opat

-    Tintin Marangkup

-    Godang ni ulos

-    Ari/inganan pamasumasuon

-    Godang ni undangan

Pesta unjuk si songon on somalna metmet do alai ruhutruhut ni paradaton sarupa do tu pesta unjuk taruhon/nialap jual. Molo ulaon sadari do paranak dohot parboru paradehon jualna asa adong pangkeonna di ulaon mebat.

-

d. Manuruknuruk

Dung manang pigapiga bulan dung mangalua keluarga na imbaru on, ro do muse nasida rap dohot dongan tubuna, boruna laho manuruknuruk. Di ulaon manuruknuruk mamboan sipanganon dohot namargoarna do paranak, jala parboru pe paradehon dengkena dohot ulos holong (ulos herbang) jala manjou dongan tubu, boru/bere songon i nang dongan sahutana. Andorang so marsipanganon dope, jolo dipasahat paranak do tudutudu sipanganon i tu jolo ni hulahulana (parboru) songon i nang parboru pasahathon dengkena tu pamoruonna.

Sidung marsipanganon marpanungkun ma parboru taringot tu tudutudu ni sipanganon i. Paranak mangalusi ala pajolo holong papudi uhum nasida, ai sada aturan ni adat Batak do molo niluahon sada boru ingkon laho do muse manuruknuruk tu huta ni hulahula nang pe naung ditaruhon pangabis paboa naung nirajahon borunasida.

Dungi pasahat hata nauli hata nadenggan hata gabe ma hulahula tu pamoruonna jala dipasahat dohot ulos holong tu hela dohot boruna. Di ulaon manuruknuruk paranak pasahat pasituak na tonggi tu parboru andorang so mangampu hata. On ma sada cara na resmi ni paranak patuduhon natinangkona (naniluahonna). Dung diulahon manuruknuruk nunga bebas hela dohot boru tu huta ni simatuana/natorasna.

-

e. Mangadati (adat na gok) (sulangsulang pahompu)

Dinalaho manggarar utang (adat na gok) paranak, tong do ro nasida manggonghon. Ditingki na mangundang on, pihak paranak mamboan sipanganon lengkap dohot namargoarna, parboru paradehon dengkena. Laos ditingki on ma dihatai (digollit) sadia godang sipasahatonnasida di ulaon sulangsulang pahompu na naeng sipatupaon i, angka on ma:

-          Sombasomba ni uhum (batu ni sulangsulang) alai molo dung marpahompu didok ma goarna: “Sulangsulang sian pahompu”

-          Suhi ni ampang na opat

-          Pinggan panganan

-          Godang ni ulos herbang

-          Ulos tinonun sadari

-          Tintin marangkup

-          Ari dohot tanggal ni ulaon

-          Godang ni undangan sian parboru

-          Alaman (ingan ni ulaon)

Suman do ulaon on songon ulaon na mangarangrangi. Dung sidung sude dihatai/dirangrangi, pihak parboru pasahat hata pasu gabe tu pihak paranak. Andorang so mangampu hata pasu gabe dope pihak paranak, jolo pasahatonna do pasituak natonggi tu horong ni parboru songon di tingki na manuruknuruk. Mangampu ma pihak paranak, dipasahat ma muse tu pihak parboru (hulahula) laho manutup ulaon i dung sidung mangampu. Jadi diujungi parboru (hulahula) ma dohot ende dohot dibagasan tangiang.

Ulaon mangadati di alaman ni paranak. Borhat ma pihak paranak manomunomu pihak parboru (hulahula) di harbangan asa masuk tu alaman/gedung. Jala molo nunga atur sude inganan/hundulan ni angka tutur naniontang ni hasuhuton na dua pihak, marpanungkun ma pihak paranak molo naung boi do mulaan marsipanganon. Dialusi pihak parboruma naung singkop sian nasida jala nunga boi marsipanganon.

Andorang so dimulai marsipanganon, jolo pasahaton ni pihak paranak do tudutudu ni sipanganon tu pihak parboru. Suang songoni do nang pihak parboru tong do pasahatonna dengke simudurudur tu pihak paranak. Namamilang tangiang sipanganon pihak parnak do. Dung sidung marsipanganon marbagai jambarma. Di tingki na marbagi jambar on  parboru, pihak paranak pe mangido tingki sian pihak parboru asa boi nasida mangido tumpak sian angka tondongna.

Panghataion di ulaon mangadati dos do songon di ulaon namarhata sinamot di pesta unjuk, alai dang sinamot be goarna didok ma “Sombasomba ni uhum/batu ni sulangsulang” sian pahompu molo nunga adong pahompu. Songoni do nang todoan tu suhi ni ampang na opat, pasahaton ni paranak do tu pihak parboru. Tintin marangkup pe tong do pasahaton ni suhut na dua pihak (parboru dohot paranak) tu tulang ni anak mangoli dohot angka pinggan panganan.

Jala angka ulos herbang dohot ulos tinonun sadari dipashat pihak parboru do tu pihak paranak. Dung sidung on sude diulahon ma marhata sigabegabe. Sude tahe ruhutruhut ni paradaton/parjambaron di ulaon pesta unjuk sarupa do dohot di ulaon mangadati.

Catatan: Molo di dok na mangalua songon sada jalan pintas, sasintongna dang tepat. Alana molo neng do pardongansaripeon i dibagasan adat na gok, gabe tamba do kewajiban siulahononton tu tingki na ro.

Leave a comment

Filed under Adat, Habatahon, Mangoli, Muli